全城熱話：家燕姐為陳總祈禱

廉政公署日前拘捕無綫電視業務總經理陳志雲、監製錢國偉及陳志雲私人助理叢培崑等。有指陳志雲涉嫌收受叢培崑開設的廣告公司利益，又有指陳志雲及錢國偉以其職權壓藝員價，全城藝人對事件甚表關注。

薛家燕：我睇到呢件事都唔安樂，希望冇事同埋係誤會，陳生身為上司係好關心下屬，有乜嘢同佢溝通佢會即時安排。如果為咗錢發生呢件事唔可能，有時我叫佢做義工同做講座，佢都義不容辭幫我。我估佢心情都唔好，喺 ICAC留咗日幾都幾辛苦，佢都冇回覆我，我會為佢祈禱。對於有指高層收名貴禮物，我就年年送月餅，化妝阿嬸都會送，呢啲唔係奉承，中國人禮儀，係一份心意。

張可頤：我睇到呢件事都非常震驚，希望快啲水落石出，上次見陳生都係《志雲飯局》嘅事。我自己未聽過思潮呢間公司，大家唔好亂咁揣測，因為件事仲查緊，唔好妖言惑眾。 ICAC暫時冇搵我問話，我都冇俾人壓過價。至於送禮呢啲，我就鬼婆咗啲，唔識做，但送吓月餅就好平常，唔好諗得太誇張，但係送手錶手袋呢啲就敏感啲，要睇番個交情。

馬德鐘：有冇問話我唔方便講，同埋有冇做思潮嘅工作，都似同案情有關，都係唔方便答。我自己一向都冇陳生電話，私下冇乜接觸。𠵱家都唔知係咪事實，都未落案，好多嘢都唔確定。其實好多客都壓價，所以價錢呢啲要經常傾，同埋好多朋友都會搭膊頭 o架啦。我覺得件事都係調查緊，我估暫時對公司唔會有問題。

李珊珊：我冇做過有關所指嗰間製作公司嘅活動，由 18歲就認識錢國偉，佢由細睇到我大，希望佢安然無恙，我有 sms畀佢話無論發生乜嘢事都支持佢，佢有立即回覆我感激。

錢嘉樂：唔擔心要協助調查，我鍾意飲咖啡 o架，作為朋友好擔心錢國偉，呢段時間冇搵佢，做朋友在心中，希望佢冇事。我同無綫係部頭約，之前拍 Laughing哥套電影都係我做動作指導，酬勞合理，我嘅武師班底唔係經我直接出糧，係我先同無綫傾好價錢，再由無綫直接出糧，咁樣最均真，綵排時唔計錢，但真正開工一定會計，而其他獎門人節目係無綫節目，冇遇過報道所講嘅情況。

Dear Jane：廉署入去電視城調查之後佢哋封城，唔畀傳媒入去，咁啱當日我哋要入去做嘢，入到去真係多咗唔少保安，氣氛好沉寂， canteen都冇乜人咁，不過工作人員就冇叫我哋唔好四圍去，錄影工作如常。至於酬勞，我哋做《翡翠歌星賀台慶》係有酬勞，不過由公司傾，我哋就唔見有乜嘢利是。

陳柏宇：我有聽過件事，上次澳門《翡翠歌星賀台慶》都有收歌手合約騷錢，但幾多我真係唔知，因為酬勞係公司傾，我只係久不久收到賬單，而私人騷就會問吓酬勞幾多錢。