2013-12-13 13:01
sinta
人氣女主播外遇被捉 籌旗賠人妻
邊位女主播有外遇？之唔係喺日本好紅嘅人氣女主播脊山麻理子囉！佢最近都算黑仔喇，繼之前爆出同老公協議緊離婚之後；前日又有日本傳媒報道話佢做咗人哋小三，仲要為外遇付出代價，支付對方妻子100萬日元嘅賠償金。
脊山麻理子04年加入日本電視台，才氣同美貌吸引咗唔少粉絲，成為人氣主播。09年，佢嫁咗俾一位圈外人，之後仲離開埋電視台，做咗自由女主播。不過日前就爆出佢同老公竟然協商緊離婚，原因有傳係佢地聚少離多。
但報道話根據一位廣告業界嘅人話，其實麻理子6月嗰時已經有外遇，對象係一位30幾歲嘅廣告業界人A先生。佢哋係透過朋友介紹識嘅，起初兩個都知對方有家室，不過A先生都照追麻理子，之後仲發生埋關係。喺出軌之後，麻理子就變得更加積極，即使A先生話周末要同老婆一起，脊山麻理子都照樣搵A先生，仲將自拍照send畀佢。
據日本《周刊女性》報道話，今年九月，A先生嘅老婆發現佢哋關係唔正常，脊山麻理子仲同對方解釋話，只係私底下有見面，不過就冇任何其他過分行為。最後經過兩次嘅交涉，麻理子先肯認有外遇，並決定賠償100萬日元。有知情人士就爆料，脊山麻理子之前一直唔敢認有外遇，係因為做咗自由女主播之後有啲手緊，嗰100萬賠償金都係同屋企人籌咋！
[img]http://static.apple.nextmedia.com/images/apple-photos/video/20131213/org/1386879056_96b3.jpg[/img]
來源:蘋果日報網站