港台變臉男星逐個睇 鄭元暢被指：換咗塊面

變臉唔再係女星專利，中港台三地男星，都經常捲入變臉疑雲，好似黃曉明､林峯､汪東城､炎亞綸､胡鴻鈞及柯震東等，都成日被傳「修葺」過。

而去年服完兵役再投身娛樂圈嘅台灣型男鄭元暢（小綜），近日亦被指「個樣唔同咗」，日前小綜上節目時，被徐熙娣（小S）及蔡康永直指「根本換了張臉」，當時小綜解釋係「瘦身有成」，但小S似乎唔接受呢個解釋，佢仲直指小綜塊面「做過手腳」。

前日就有網民貼咗小綜剛出道照片，以及近照作對比，仲話小綜雙眼皮出來､鼻亦高咗､嘴巴也豐滿，下巴又唔同咗，總之整個人都唔一樣﹗

唔少「綜迷」議論紛紛，有人覺得冇乜分別，又有人話佢原本係內雙，對此小綜經理人解釋，小綜當兵時靜靜雞去咗整牙，至今仍然戴牙套，加上瘦身及戒埋酒，所以睇嚟就唔同咗囉﹗

至於另一台灣帥哥陳柏霖，就被網民貼返13年前嘅青澀靚仔照，同依家個樣分別唔大喎，至少好多網民都一眼認出係佢本人呢﹗


[img]http://static.apple.nextmedia.com/images/apple-photos/video/20140129/org/1390940643_e372.jpg[/img]


來源:蘋果日報網站