譚玉瑛愁爆搭港鐵　仲未傾續約

[youtube]fdkGXejQdw4[/youtube]


無綫準備改革兒童節目，為咗要年輕化，計劃將現年50歲、做咗32年兒童節目嘅譚玉瑛踢出局，一方面要佢由主持轉做顧問，但又遲遲唔同佢進一步傾新約，疑採拖字訣，等今個月約滿嘅譚玉瑛約滿後「自然流失」。呢件事曝光之後引起網民不滿，而前日無綫高層李寶安喺立法會出席兩台續牌會議嗰陣，仲有團體開聲叫無綫唔好搞譚玉瑛㖭。

感激網民支持
俾公司搞到好迷惘好唔開心嘅譚玉瑛，前晚7點45分左右，喺將軍澳電視廣播城錄影完《放學ICU》之後，搭公司城巴去將軍澳港鐵站搭港鐵去中環，其間佢坐喺車廂度聽歌，頭耷耷愁眉深鎖，個樣好悶悶不樂，似乎為咗近日續約問題而煩惱。

譚玉瑛喺中環轉東涌線，去到欣澳站準備搭巴士返愉景灣屋企，記者上前問佢，前日新聞出咗街之後無綫有冇同佢聯絡傾續約問題，譚玉瑛就話：「因為我今日入廠，冇呀！寫字樓啲人今日都唔返工。」問無綫有冇責怪同傳媒講咁多而唔同佢續約？佢話：「都冇接觸。」記者話好多網民唔捨得佢，好想佢繼續做落去，譚玉瑛即刻笑番晒話：「係呀？我梗係好開心啦，咁多人支持我。係咪真㗎？」假如無綫唔續約，會唔會考慮去其他電視台發展？譚玉瑛話：「暫時我唔會諗咁多住，我會用平常心去繼續……唔好擾亂我生活先啦，唔會因為咁而令我諸如此類，我個人係咁嘅。」

[img]http://static.apple.nextmedia.com/images/apple-photos/apple/20140317/large/17ec4p1aaa.jpg[/img]
■一身黑衣打扮嘅譚玉瑛前晚錄完節目之後搭港鐵返歸。

[img]http://static.apple.nextmedia.com/images/apple-photos/apple/20140317/large/17ec4p4aaa.jpg[/img]
■譚玉瑛去到欣澳站落車，跟住轉搭巴士返愉景灣。

[img]http://static.apple.nextmedia.com/images/apple-photos/apple/20140317/large/17ec4p6aaa.jpg[/img]
■本來悶悶不樂嘅譚玉瑛，聽到好多網民撐佢之後即刻好醒神咁笑番晒。

來源:蘋果日報網站