Coffee飯碗凍過水 木偶哥車震斷正唔使死

[img]http://static.apple.nextmedia.com/images/apple-photos/video/20140626/org/1403727460_d135.jpg[/img]

真係同人唔同命，Coffee林芊妤就話同上市公司董事喺ifc廁格大戰斷正，鞠躬道歉求原諒希望有得留低，但樂易玲權威地謂「唔會姑息」，又話Coffee應該都自知是否適合做呢行，講到毫無退路咁，睇怕Coffee星途真係凍過水。

Coffee冇後台，齋識有錢人拖手仔冇用㗎，你睇「木偶哥」林師傑就知啦，日前被周刊踢爆佢背住女友鄧穎芝偷食，仲要車震斷正，俾女友見到佢同個女仔喺後座攬埋一嚿，難怪鄧穎芝嬲爆兼喊爆，於fb轉貼彭順偷食Liddy（李悅彤）嘅報道話：「商場攬啜好少嘢啫，相比起嗰個人偷食，半夜揸架車去荒山野嶺同個女仔喺後座唔知做咩，差幾皮！」仲係唔止一次於fb鬧爆，可想而知鄧穎芝有幾痛心!

但係大家有冇發覺，鄧穎芝呢排收晒聲，冇講任何嘢呢？噚日有報道話，係因為林師傑阿媽背後發功，一方面就向好友曾勵珍補鑊，希望無綫放過阿仔，同時又出動音波功，日日致電煩住鄧穎芝，表面上就係關心佢、噓寒問暖，實際上就係希望鄧穎芝收口，唔好再公開貼po鬧自己個仔。

咁又係，林師傑依家憑《愛•回家》木偶哥一角冧死女，叫做多咗人識，自然唔想繼續俾人唱。而林師傑阿媽原來仲係N年前主持過無綫婦女節目《婦女新姿》嘅主持韓珍，同無綫高層曾勵珍有偈傾，故此爆出林師傑呢單嘢之後，林師傑阿媽馬上代仔向高層補飛，之後無綫亦未有如回應Coffee單嘢咁，以「唔會姑息」咁盡去回應。林師傑仍繼續開工，冇事發生過；鄧穎芝就去咗美國讀聲樂，順便療情傷。

來源:蘋果日報網站